Қазақстандық банктердің бірінің ішкі сервистеріне парольдер ашық қолжетімділікте болды
Банк секторына жасалған шабуылдар – бұл құпия ақпараттың таралып кетуіне, деректердің, ақшалай қаражаттардың жоғалуына, банк жүйелерінің бұзылуына әкеп соғатын үлкен қауіп. Зиянкес желіге қызметкердің қорғалмаған жұмыс станциясы, ескірген бағдарламалық қамтылым немесе қашықтан қол жеткізу құралдары арқылы еніп, деректерге қол жеткізе алады.
«Мемлекеттік техникалық қызмет» АҚ қызметкерлері осы сияқты жағдайдың жолын кесті. Қазақстандық Интернетке мониторинг жүргізу процесінде «МТҚ» АҚ мамандары Қазақстанның екінші деңгейдегі банктерінің бірінің интернет-ресурсында осалдықты анықтады.
CWE-530 – веб-қосымша файлдарының резервтік көшірмелері (бэкап) рұқсатсыз қол жеткізу үшін ашық қалған кезде пайда болатын осалдық.
«МТҚ» АҚ мамандары веб-қосымшаның бастапқы кодын қамтитын бэкап файлды (авторланбаған пайдаланушылар жүктей алуы үшін қолжетімді) анықтады. Бэкап файлда клиенттер мен банк қызметкерлерінің жеке ақпараты болды, атап айтқанда: ішінде VPN-ге қол жеткізу парольдері бар банк қызметкерлері туралы ақпарат қамтылған 11 файл. Техникалық тұрғыдан осы деректерді пайдаланып, банктің кейбір ішкі жүйелеріне қашықтан қосылуға болады. Бұл, өз кезегінде, шоттарға рұқсатсыз қол жеткізуді және қолма-қол ақшаны алуды жалғастыру мақсатында шабуыл векторы ретінде пайдаланылуы мүмкін.
Киберқылмыскерлердің басты мақсаты – қаражатты ұрлау немесе төлеп өтеуді алу мақсатында пайдаланушылардың деректерін алу немесе банктің инфрақұрылымына қол жеткізу екенін тағы да естеріңізге салғымыз келеді.
Екінші деңгейдегі банктер мен қаржы ұйымдарына авторланбаған пайдаланушыларға бэкап файлдарға қолжетімділікті шектеуді ұсынамыз.
Қазіргі таңда осалдық жойылғанын хабарлаймыз. Техникалық мәліметтермен STS.KZ сайтында «Ұсыныстар» бөлімінде танысуға болады.
